Rare Willie Drowned in Yarrow, or, The Water o Gamrie
No: 215; variant: 215C
- 'WILLIE'S fair, an Willie's rare,
An Willie's wondrous bonny,
An Willie's promised to marry me,
If eer he marry ony.'
- 'O sister dear, I've dreamed a dream,
I'm afraid it's unco sorrow;
I dreamed I was pu'in the heather green,
In the dowie dens o Yarrow.'
- 'O sister dear, I'll read your dream,
I'm afraid it will be sorrow;
Ye'll get a letter ere it's een
Your lover's drowned in Yarrow.'
- She socht him up, she socht him doun,
In mickle dule an sorrow;
She found him neath a buss o brume,
In the dowie dens o Yarrow.
- Her hair it was three quarters lang,
Its colour it was yallow;
She tied it to his middle sma,
An pu'ed him oot o Yarrow.
- 'My bed it was made wide yestreen,
The nicht it sall be narrow;
There's neer a man lie by my side
Since Willie's drowned in Yarrow.'