PR Website

Lord Saltoun and Auchanachie

No: 239; variant: 239B

  1. 'BUCHAN, it's bonnie, an there lies my love, My heart is fixt on him, it winna remove; It winna remove for a' at I can dee, An I never will forsake him Young Annochie.'
  2. Her father cam trippin, cam trippin ben the floor, Says, Jeannie, ye hae but the tricks o a whore; Ye care little for the man that cares muckle for thee, But I'll cause you marry Saltoun, let Annochie be.
  3. 'Ye may marry me to Saltoun before that I go home, But it is to Lord Saltoun I'll never bear a son; A son nor a daughter I'll never bear to he, An I never will frosake him Young Annochie.'
  4. 'All you that is her maidens, ye'll tak her by the han, An I will inheft her o five thousan poun; She'll wear silk to her heel and gowd to her knee, An I'll cause her to forsake him Young Annochie.'
  5. 'All you that is my maidens winna tak me by the han, I winna be inhefted o five thousan poun; I'll nae wear silk to my heal nor wear gowd to my knee, An I never will forsake him Young Annochie.'
  6. 'All you that is her maidens, ye'll show her to her bed; The blankets they are ready, the sheets are comely spread; She shall lie in my airms till twelve o the day, An I'll cause her to forsake him Young Annochie.'
  7. 'All you that is my maidens winna show me to my bed, Tho the blankets they be ready, the sheets be comely spread; I'll nae lie in your airms till twelve o the day, An I never will forsake him Young Annochie.'
  8. It's that day they wedded her, an that day she died, An that day Young Annochie cam in on the tide; . . . . . . . . . .
  9. Her maidens did meet him, a' wringin their hans, Sayin, It's a' for your stayin so long on the sans! They've wedded your Jeannie, an now she is dead, An it's a' for your stayin sae long on the fleed.
  10. 'All you that is her maidens ye'll tak me by the han, Ye'll show me the bower that Jeannie lies in:' He kissed her cold lips, they were both white an red, And for bonnie Jeannie Gordon Young Annochie died.